وصفة شوربة العدس الشهية

نقدم لكي سيدتي طريقة عمل شوربة عدس الشهية والغنية بالفيتامينات والبروتينات

مقادير وصفة شوربة العدس :

  • 2 كاسة عدس مجروش
  • 4 معالق رز قصير
  • ماء حسب الرغبة
  • 2 بصل مفروم
  • ملح و فلفل
  • كمون حسب الرغبة
  • كركم أو عصفر مشان اللون

طريقة تحضير شوربة العدس :

بتغسلي العدس مع الرز منيح بعدين بتحطيون مع 6 كاسات مي عنار قوية ” فيكون تزيدوا كمية المي أو أقل حسب ما بتحبوا سماكتا ” و بس يغلوا بيطلع شي أبيض عالوش متل الزفرة بتقيميون بالمعلقة و بتطفي عليهون…بتكوني محضرة طنجرة تانية بتقلي فيا البصل بشوية زيت و زبدة و بس يدبلوا بتضيفي فوقون العدس مع المي تبعو و بتحطي البهارات يلي هي ملح و فلفل و كمون حسب الرغبة و شوية كركم أو عصفر مشان اللون ” أنا حطيت كركم ” بتغطي عليهون نص تغطاية مو بشكل كامل مشان ما يفوروا..بس يغلوا أول غلوة بتوطي عليهون النار و بتستني شي نص ساعة تقريباً ليصيروا…و شوفي إذا نقصون مي بتزيديلون , و أنا آخر شي طحنتون بالبراون و هني بالطنجرة بعدين رجعتون عالنار شوي ليغلوا و بس .
و إذا بتحبي فيكي تضيفي قطع جزر و بطاطا و كوسا صغار بتقليون شوي مع البصل و بتكملي الخطوات عادي بس ساعتا بصير بدون أكتر من نص ساعة ليستوو … و صحتين و هنا